閱睇閱健康｜即飲湯水要睇清！高鈉陷阱要小心

前排好多人都話某個牌子嘅即飲湯香濃又好味 ，仲拍得住餐廳嘅質素，搞到好多地方都斷晒貨，唔少人都想買返盒一試究竟 ！但你有冇諗過，其實即飲湯產品有機會暗藏高鈉陷阱？
以市面上一款即飲湯產品為例，每100克就已經含有大概800毫克嘅鈉，佔咗成年人每日鈉攝取量2000毫克嘅40%；而根據食物安全中心嘅研究，本港成年人攝入鈉嘅其中一個主要食物類別為湯水(14%)，而膳食中攝入過量嘅鈉(鹽)可能會大大增加患上高血壓、中風、冠心病同腎臟疾病等嘅風險，健康隨時響起警號 。
所以，想踏出健康第一步，就要學識睇預先包裝食品上嘅營養標籤，選購健康食品；而以下就係一啲低鹽/低糖/無鹽/無糖嘅標準 ：

低鈉（鹽）：該食物每100克或毫升食物含唔超過0.12克（120毫克）鈉。
無鈉（鹽）：該食物每100克或毫升食物含唔超過0.005克（5毫克）鈉 。
低糖：該每100克或毫升食物含唔超過5克糖。
無糖：該每100克或毫升食物含唔超過0.5克糖。

即刻讚好全城減鹽減糖Facebook專頁，隨時緊貼減鹽減糖小貼士
記得Follow埋IG呀： https://www.instagram.com/hkassr/